MENO YA TEMBO 495 YAKAMTWA NCHINI KWA MIEZI MIATATU

JUMLA ya meno ya tembo 495 yamekamtwa kwenye maeneo mbalimbali nchini katika kipindi cha cha miezi mitatu kuanzia Januari mpaka Machi mwaka huu.

Aidha watuhumiwa wa ujangili 544 wamefunguliwa mashtaka kwenye mahakama mbalimbali ambapo kesi 62 zimemalizika huku 38 zikiwa bado zinaendelea.

Hayo yalisemwa jana jijini hapa na Kaimu Mkurugenzi wa Idara ya Wanyamapori kutoka Wizara ya Maliasili na Utalii, Paul Sarakikya alipokuwa akitoa taarifa ya robo mwaka juu ya hali ya ujangili hapa nchini.

Alisema kuwa nyara hizo za Serikali  zilikamtwa kufuatia doria iliyoendeshwa na watumishi wao waliopo kwenye mapori ya akiba na kikosi cha kuzuia ujangili kwenye maeneo mbalimbali.

Sarakikra alisema kuwa katika kipindi hicho  jumla ya mizoga ya tembo 39 ilionekana ndani na nje ya hifadhi za Taifa na Mapori ya akiba huku nyama za wanyamapori kiasi cha kilo 1,111 zikikamtwa.

“Aidha meno ya tembo yaliyoakamtwa yalikuwa katika hali mbalimbali ambapo mazima yalikuwa 171, vipande 22 vya meno ya tembo ghafi, vipande 302 vya meno ya tembo yaliyochakatwa yenye jumla ya kilo 662.62 yalikamatwa,” alisema Kaimu Mkurugenzi huyo wa Idara ya Wanyamapori.

Alisema kuwa pia walifanikiwa kukamata silaha 11 ikiwemo bunduki ya rasharasha 1, Rifle 3, Shotgun 2, gobore 5 pamoja na risasi 7 za aina mbalimbali.

“Mali na vifaa vingine vilivyokamatwa ni pamoja na magari matano ambavyo vilikamtwa kwa kuhusika kwenye vitendo vya ujangili hasa wa meno ya tembo, ng’ombe 2,663 walioingia kwenye hifadhi pamoja na msumeno mmoja wa kukata mbao na mbao 745,” alisema Sarakikya.

Alisema kuwa kati ya kesi 124 zilizofunguliwa kwenye mahakama tofauti nchini  62 zilizokuwa na washtakiwa 85 zilimalizika kwa watuhumiwa kulipa faini ya zaidi y ash milioni 25.5.

Sarakikya alisema kuwa meno ya tembo waliyokamata yalitokana na matukio ya siku za nyuma jambo alilodai kuwa walilibaini kutokana na meno hayo kuwa yamebadilika rangi kwa kuchimbiwa ardhini muda mrefu huku mengine yakimeguka.

Taarifa hii imekuja siku moja baada ya watu sita wanaodhaniwa kuwa ni majangili kukamatwa na meno ya tembo 53 yenye jumla ya kilo 169.7 wakiwa na silaha aina ya SMG yenye magazine tatu kwenye kijiji cha Kiomboi wilayani Manyoni Mkoani Singida