UV CCM HAPATOSHI WACHAPANA MAKONDE HADHARANI

WAPAMBE wa wagombea kwenye uchaguzi  wa Umoja wa Vijana ya Chama Cha Mapinduzi, (UVCCM), Wilaya ya Arusha wamechapana makonde hadharani baada ya kutofautiana lugha wakati wakiingia ukumbini.

Purukushani hiyo ilitokea jana majira ya asubuhi na kudumu kwa zaidi ya dakika 20 wakati  wajumbe wakiingia kwenye mkutano huo uliofanyikia kwenye ukumbi wa hoteli ya Golden Rose kabla mgeni rasmi ambaye ni Mkuu wa wilaya ya Arusha, Gabriel Daqqaro hajawasili.

Hali hiyo iliwalazimu kampuni Ultimate security 

wanaolinda hoteli hiyo kuimarisha ulinzi kwa kuongeza gari lenye idadi kubwa ya walinzi na vifaa ili kuhakikisha wapangaji na watumiaji wengine wa jengo hilo wanakuwa salama.

Vurugu hizo ambazo zilishuhudiwa na wapangaji wa jengo hilo pamoja na wapita njia zilidumu kwa zaidi ya dakika 20 huku zikiwacha baadhi ya wapambe hao wakiwa wamechaniwa nguo.

Inadaiwa kuwa kilichopelekea kuibuka kwa vurugu hizo ni baada ya wapambe kutuhumiana kuwa kuna matapeli kwenye kambi za wagombea wa nafasi ya uenyekiti zilizokuwa zinawaniwa na Jimmy Pamba na Godliving Kisila.

 Inadaiwa kijana  wa kambi ya Kisila,Hussein Abdallah alimtuhumu mwenzake,Lameck Dudu ambaye yuko kambi ya Pamba kuwa eneo la uchaguzi wakati  si mjumbe halali wa  mkutano huo na huku akimwita  kuwa  tapeli la kisiasa.

Kauli  hiyo haikumfurahisha Dudu ambapo aliamua kurusha konde zito lililompata kisawasawa Husein na kupelekea kudondoka chini.

Hali hiyo ikawaibua wapambe wa pande zote ambao walianza kurushiana Makonde ambapo kwenye eneo hilo alikuwepo askari mmoja wa kike wa kikosi cha kituliza ghasia (FFU), ambaye alijaribu kuwamua bila mafanikio.

Inaelekea alitoa taarifa polisi kwani gari la polisi liliwasili likiwa na Idadi kubwa ya askari ndipo wakafanikiwa kurejesha hali ya amani kwenye eneo hilo.

Mmoja wa vijana aliyekutwa na zahama hiyo na kuchaniwa nguo zake pamoja na
kupata kibao, Silvester Meda  alisema
hajui kosa alilotenda mpaka astahili kupatiwa kipigo hitching.

Meda alidai UVCCM Arusha imezungukwa na wahuni, hivyo chama kinapaswa
kuwachukulia hatua wote walioiabisha Jumuiya hiyo kwa maslahi yao.

Katibu  Hamasa wa UVCCM Wilaya ya Arusha,Abdi  Marijana  aliwataka polisi kumkamata Dudu kwani ndiye
aliyesababisha vurugu hizo kwa kufika kwenye mkutano huo wakati akijijua si mjumbe.

‘’Dudu alipaswa kukamatwa kwani ndiye aliyeleta vurugu kwa kumpiga
ngumi Hussein Abdalla, lakini polisi hawakufanya hivyo hilo mie sijui
ni kwa nini,’’alisisitiza.